波波!

一直以黎, 對住威少同小白兩個, 不論是否圓形物體都好, 我都統稱所有玩具做 "波波" 嘅! 姨姨就話我好教佢地 d 錯嘅名詞! 不過我覺得咁樣幾好呀! 要佢記住 d 玩具名有咩用先? 玩得開心就得啦!

之前都有講過, 一般十零廿蚊嘅膠玩具對於威少黎講就好似香口膠一樣, 一陣就掉得! 但係呢個車軚玩具, 佢已經玩左 almost 一年! 以 $38 黎講, 真係抵玩到爛!

especially to 肥寶媽 ---> 我見到西貢萬寧旁寵物店有番貨喇! 快 d 買番個俾肥寶呢個小 killer 啦! 有排玩呀!

威少最鍾意我地同佢鬥扯車軚~

個衰仔而家好大力架! 要紮穩個馬先可以同佢鬥扯架! 有時佢玩得開心過頭, 唔覺意咁咬左落我隻手度, 都幾甘架! 最堅係佢 d 口水, 每次玩親都成手都係! 又會玩到週圍走, 週圍跳! 小白都怕鬼左佢!

次次小白一見到威少玩車軚指定動作~

我小白幾穩陣先得架! 見到威少玩車軚好似上身咁! 仲唔拿拿聲 "哩" 係檯底咩! 一陣俾威少踩一腳就真係手尾長喇!

威少個傻仔, 成日都要個車軚 "膀" 係身邊架! 慌死人地偷左咁款!

咬哂唇咁~

 

笑騎騎咁~

有冇留意到威少對手呀? 摺埋坐架! 有冇見過洛威會咁樣摺埋對手坐架? 我地威少唔知係咪見得細 b 同 coffee 多! 坐都坐到成隻貓咁!

呢張笑騎騎相影到威少仲好似個小朋友咁! 係近期少有佳作黎架!

孤獨 lam lam 脷晚餐

原本買左餸煮飯, 但係葉生又去左幫朋友搬野, 得我一個人, 費事大鑼大鼓煮飯食咁麻煩, 呢個就係我 d 冰箱存倉精選出場嘅時候喇!

冰箱存倉精選一  -------> 印度烤餅

呢 d 烤餅剩係百佳先有得賣, 我平時多數買紅色包裝袋果隻, 不過今次呢隻都 ok!

平時將佢放係冰箱, 煎嘅時候先攞出黎, 完全唔駛解凍, 油都唔需要落, 就咁硬雷搥咁放落鑊 "漢" 到兩邊都 "窿窿" 地,中間卜起就得! 有時煮咖哩又可以整呢隻燒餅點汁食, 唔駛成日食飯咁 dry 麻! (價錢 12.9 一包五塊)

冰箱存倉精選二 -------> 煙鴨胸

其實呢個煙鴨胸係葉生鍾意食, 有時煮麵放兩塊落去都幾過癮架! (深水埗凍肉鋪價 15 蚊兩條, 有黑椒味同原味)

我將黑椒煙鴨胸切片放入焗爐焗 (冇煎咁多油), 跟手再 "漢" 左一塊烤餅就大功告成喇!

用燒餅夾住 d 煙鴨胸黎食, 仲有 d 食緊北京填鴨 feel 添!

泡菜炒飯

作為一個咁 creative 嘅靚師奶, 久唔久我都會整 d 新野 "反" 下嘅~

最新作品就係呢個泡菜炒飯~

其實我以前唔食泡菜架! 不過唔知係咪年紀大口味轉, 近兩年成日都會搵 d 有泡菜嘅餸黎整, 但係而家係 supermarket 賣緊嘅泡菜, 三十幾蚊一大包, 我得兩條友, 又好似惡攪左 d!

好彩我同事係千色店幫我買左兩盒細細盒嘅泡菜, 仲要係 $8 一盒咋! 真係 fit 到爆呀!

其實我都係好似整普通炒飯咁, 用 d 雞蛋, 叉燒炒好 d 冷飯, 再將 d 泡菜切碎, 再連埋 d 汁倒入 d  炒飯度, 調味之後再落埋 d 蔥, 炒多兩野就攪掂!

雪菜肉絲炒年糕

並唔係我認叻, 呢 4 日假期, 除左第一日 (星期五) 出去省城買餸而係出面食左個 lunch 之外, 咁多日以黎每一餐都係我親自煮出黎架!

呢個雪菜肉絲炒年糕就係我又一 fusion 傑作喇!

原本食譜係湯年糕, 但係我又唔想咁 "淡貿貿", 所以就參考另外上海炒年糕方法, 整左呢個雪菜肉絲炒年糕喇!

我都係第一次整呢 d 上海即食年糕, 發覺都幾抵食, 一蚊一條, 我用左 5 條, 買埋瘦肉同雪菜, 夾埋都唔駛廿蚊! 就足夠兩個人食有餘喇!

我真係一個持家有道嘅住家少婦呀!

討厭的春天!

天氣開始熱番, 屋企果三個大帝嘅換毛時間又開始喇!

小白就好 d, 佢唔會點甩毛, 只係會不停生長, 所以耐唔時就要同小白剪毛!

coffee 同細 b 兩個 d 毛輕飄飄, 吹到成屋都係, 櫃頂, 電視機, 梳化全部無一倖免!

睇下我張梳化...........真係睇見到眼冤呀...........

兇手 coffee 訓著都識笑..............

如果著黑色衫, 就算洗乾淨都好, 只要係屋企入面掛過一陣, 著出黎都係成身毛!

最攞命就梗係威少啦! 佢一換毛真係攪到人都癲呀! 係成餅成餅係地下果隻呀!

有咩解決方法?

咪晚晚最少拖兩次地, 又用紙拖把, 仲要同威少出花園梳多幾次毛 lor!

一路梳毛仲要擔驚受怕, 驚樓上大肚婆兩隻狗 "針" 茶俾我飲呀!

春天好討厭呀!!!!!!!!!

回到十幾二十時.....

姨姨個仔同老婆由美國返黎探佢, 上星期六我地一齊去左沙田食飯, 跟住再殺落諾士佛台飲野, 之後再去美麗華加洲紅唱 k, 由旁晚六點玩到凌晨六點, 簡直係勁呀!

可能我同姨姨個女果日個髪型差唔多, 唔少人都話我地似樣, 姨姨有個朋友仲誇張到認錯左我係姨姨個女 tim!

姨姨個仔同佢老婆都好 friendly 架! 佢地兩個剛剛係美國結婚, so sweet!

我幾鍾意呢張同葉生影嘅相, actually 我地好少影合照, 其實以我咁好條件, 真係應該影多 d 相~

係諾士佛台果間 bar 入面有個雪房, 話得零下 10 度, 姨姨係咁要我同佢著埋 fur 入去影相~

之後去到唱 k, 唔好以為姨姨會唔夠我地班後生黎! 其實姨姨唱歌真係掂到不得了, 佢唱 Christina Aguilera 首 "lady marmalade" 真係勁到不得了! 轉個頭又可以好柔情咁唱 "月亮代表我的心", 真係估佢唔到!

呢 d 夜生活真係好耐都冇試過喇! 想當年十幾二十果時就成日都係咁, 不過而家真係年紀大, 冇訓一晚之麻, 即刻標哂瘡咁! 下次都唔好一次去咁盡喇!

自家韓國燒烤

姨姨之前係西田買左個 "韓國燒烤鍋", 諗住可以安坐家中都可以食到韓國燒烤, 唔駛出去同人逼啦! 個鍋又唔貴, 只係賣 $69, 燒番三兩次條數都抵番哂!

之前我地試過係 supermarket 買 d 韓式一口牛肉黎燒, 不過略嫌 d 雪藏味勁得滯!

今次我地係西貢街市最出名賣 BBQ 食物度, 買左牛肋骨, 西冷牛排, 金沙骨黎燒, 之後再用生菜包住 d 肉黎食! 真係一流呀!

我地下次要買埋 d 韓式燒烤醬黎試下先得!

不過............玩呢個 "韓式燒烤鍋" 有一個缺點............

就係食完之後, 成間屋都充滿住果陣油煙味呀!!!!!

我都要點左成晚香薰先去到陣除!

羊脾之下場~

上星期係寵物節買左果 5 隻羊脾, 貶下眼就冇左一半喇!

大家初時會覺得咁大隻? 點食呀?

所以今次特別搵左威少同 goofy 特別客串, 表演下點樣係最短時間內 k.o. 隻羊脾!

<<以下動作切忌模仿>>

威少作為 blue blood, 當然會用雙手 "挾" 住羊脾黎食啦! floor manner 麻!

 

食到咪哂眼咁~ 幾 enjoy 呀~

威少 k.o. 羊脾時間----------> 1 小時

輪到 goofy 出場喇! goofy 經驗豐富! 牙力十足! 全程咪埋眼係咁 "隊" 呀!

goofy 完成時間-----------> 30 分鐘

goofy 真係不愧為大哥呀! 以破記錄 30 分鐘就攪掂左隻羊脾! 之後仲有雅致 "把" 實威少威成點!

其實狗狗係可以成隻羊脾食哂嘅! 不過就要留意佢地食到剩番條骨嘅時候, 條骨會唔會有尖嘅地方, 有的話就要唔好再俾佢地食喇!

血拼寵物展!!!!!

比起上一次九展寵物展, 今次呢個真係差得多, 場地又細左, booth 又少左, 買嘅野又少左, 真係有 d 失望..........

最激氣係 ape 果 d 態度! 好似好巴閉咁! 原本話買滿 $500 送 hills 糧筒, $150 送 iams 狗袋嘅! 到我買左之後又話送哂! 果陣時都只不過係星期五晚上六點幾到! 真係想問下佢之後果兩日點算! 送手指俾人呀??

上一次我攞到四十幾包試食裝, 今次就只係攞到三十三包! 其實我攞到咁多都只因為我要求夠全面, 大型狗, 小型狗, 減肥狗糧, 貓糧, 長毛貓糧全部都得! 總之你有 tester 就得! 我屋企梗有一隻啱駛嘅!

試食裝>>>>>

係 d 試食裝入面有 d 精選架! 包括有最新出品兔肉味貓糧:

europa 脫水蔬菜 (呢幾包就真係珍貴喇!)

artemis 狗糧同貓糧.... (呢隻狗糧都叫新, 聽 d 口啤都幾好, 所以我都想俾佢地試下!)

重點就當然係小食啦! 當日有好多 booth 都有 $10 小食! 我當然唔會手軟啦! 平時 pet shop 仲邊有 $10 小食呢支歌仔唱呀!

小食>>>>>

雞肉包牛筋支 -----> $10 一包 x 10

無添加雞肉包鵝肝條 -----> $50 六包

羊仔肶 -----> $10 一隻 x 5 (呢個真係爆抵! 我之前係西貢買要 $40 一隻! 番到屋企諗諗下都覺得其實應該買多 d.......笨左.......)

羊肉飯狗糧 1kg -----> $18 一包 x 2 (得閑加小小落平時 d 糧度俾佢地食, 有新口味零舍開心架!!!)

其他輔助品>>>>>

香噴噴閃亮洗毛水 -----> $90 一支 (平時好難搵到香味啱心水嘅漂白洗毛水, 呢一支隻味好清, 啱哂我小白仔用! 仲係一比十六咁開黎用嘅!)

有機靈芝補充劑 -----> $132.5 粉末裝 8oz.

點解我會買支咁嘅靈芝粉呢? 我見姨姨隻 goofy (金毛尋回犬) 因為年紀開始大, 眼皮開始向下反, 體力又冇以前咁好, 好容易就會氣喘, 早排姨姨開始俾佢食 petz 果隻靈芝膠囊 ($480 有 60 粒), 只係三個星期, 眼皮向下反嘅情況消失左, 體力好左, 就連 d 毛色都金左! 加上我睇過一本雜誌, 有狗主係寵物細個嘅時候就開始俾靈芝佢地食, 結果小狗健康活到現時 18 歲! 我見呢隻靈芝粉又唔係貴! 不妨俾佢地四隻野試下啦! 而且小白今年都 5 歲喇! 我都想佢繼續健健康康! 咪買黎俾四隻野齊齊食 lor! 就算平時都係賣 $150 (pets central), 都 ok 抵啦!

下次真係要 search 清楚有咩 booth 先會再去呢 d 狗展! 以免希望越大, 失望越大呀!!!

寵物節花絮

星期五放工飛的過去九展, 諗住把握一分一秒掃貨, 不過今次個寵物展比起上一次細左好多, 參展商又少左, 仲要成 $25 入場費, 真係唔係咁抵!

平時都唔覺自己咁多朋友, 果日首先撞到以前男朋友嘅朋友, 如果唔係佢叫我, 我根本唔會認得佢, 可能係因為我條件太標青, 所以佢先會一望到我就叫得出我個名啦!

之後又見到平時幫趁開果間 pet shop 個 sales, 佢一見到我仲大大聲咁叫 "葉太~", 攪到我鬼死咁唔好意思...........

仲要撞到住係我樓上三樓對 couple, 佢地去大手掃 timberwolf 狗糧, 我聽佢地講 timberwolf 濕糧好抵, 平時 $25 一罐, 果日 $25 一罐仲買三送一, 佢地最後買左成二千幾三千蚊 timberwolf 狗糧走呀!

果日有 d 小狗好得意架!

有頭側側 bull dog.....

有大大件伯恩山犬

有鐘無艷 poodle (佢 d 黑色毛係天生架! 唔係染架!!!)

有好似洛威嘅小唐狗 (等待收養中.........)

仲見到有一隻洛威, 佢 d 手腳好粗架! 個骨架又大! 好有型架!

不過..........佢陣洛威 "除" 真係臭得好緊要! 我只係摸左佢兩下, 但係隻手果陣味就好耐都唔散...........真係臭到呢............我先知道我威少原來真係香噴噴架!!!

我問佢個主人點解佢陣味咁勁嘅? 佢主人話因為凍所以冇同佢沖涼 wor! 都唔 make sense 嘅! 而家都暖番好多啦! 係你懶咋! 隻狗臭賓賓都仲好意思帶黎狗展! 呢隻洛威真係慘慘呀!