人多聚會最討厭就係有人遲到, 原本約 10 點, 等下呢個等下果個咁, 終於攪到成 10 點半先係筲箕灣上車, 推遲哂成個行程!
起點位置~
條路上上落落, 又多石又斜, 竟然係越野單車徑!
"嫁個有錢人" golf club~
與石澳合照~
傻瓜機影風景照都 ok 呀~
部份行山團友~
其實當初想帶埋威少去行, 但係諗諗帶威少去咪即係搵自己笨! 又要葉生車我地去, 威少咁大舊! 唔通摺埋放入袋搭地鐵咩? 一陣威少行行下頂唔順攤係度唔肯行點算呀? 我點抬佢落山呀? 我諗威少行石屎路就得! 呢 d 咁有挑戰性嘅行山路線, 威少多數都頂唔順架!
一行十幾人行左兩個幾三個鐘, 終於到大浪灣, 仲見到我舊居已經有人住緊.....
我的舊居 (後)
我的舊居 (前)
去到棠記士多, 當然搵下我老友 bobby 仔先啦! 我由細睇住佢大, 不過搬左去西貢之後, 都差不多有兩年冇見過佢喇! 諗住佢都未必記得我啦! 點知 bobby 仔離遠見到我, 已經發傻咁衝埋我度, 我再叫多佢兩聲, 直頭拖到佢主人訓係度咁滯! 一埋到我度就係咁 "填" 身 "填" 勢! 任我摔任我舞~
冇見咁耐, 我覺得 bobby 仔大隻左好多! d 毛又厚左! 佢主人話平時 bobby 唔肯咁順攤同人影相架! 個衰仔係認得我, 見到我好開心先咁配合咋!
睇下佢咪哂眼個樣幾好笑!
仲見到以前咕嚕俾佢嘅 "愛的烙印"
話說以前咕嚕在生果陣, bobby 仔當正咕嚕係大佬咁架! bobby 仔細細個已經好鍾意跟住咕嚕, 成日撩咕嚕同佢玩, 每次 bobby 走狗, 亦都只有咕嚕一個可以搵佢番黎, 而呢個 "愛的烙印" 呢! 就係因為咕嚕食緊佢最愛牛丸果陣, bobby 仔唔知死走埋黎想食埋一份, 咕嚕醒佢嘅!
眨下眼都差不多有 3 年喇! 唔知咕嚕係天堂點呢?
天氣涼左, 其實可以帶埋威少行係ok架, 要帶多d水俾佢, 3個鐘嘅路程, 佢頂得順架呢. 不過你驚佢唔慣, 咁就仲易啦, 西貢幾鬼多地方行, 行d易嘅再行d難少少嘅咪得囉
回覆刪除不過搵車又係幾麻煩嘅事, 我一個都唔會帶d大少行山架
[版主回覆11/14/2008 08:53:00]唔.........我都籌備緊下次行西貢..........希望可以帶埋威少去啦!
你呢個行山遊又幾好喎，仲可以舊地重遊探下d老友！bobby仔個樣好嗲好開心呀！我諗佢見到你一定好開心喇！
回覆刪除[版主回覆11/14/2008 08:53:00]係呀! bobby 仔見到我好似執到金咁呀!
哈哈.....原來你以前住大浪灣 kar, 我地住石澳 kar
回覆刪除[版主回覆11/14/2008 08:56:00]真係? 咁可能早兩年石澳同大浪灣一齊攪果個太平清礁見過面 wor! 你而家仲係咪係石澳住呀? 我都仲有 d 朋友係石澳入面, 可能講講下都認識 tim 呀!
我 e + 住元朗, 其實識 keer 機會都好大 kar.......因我隻佬係石澳仔黎 kar e + 我老爺奶奶都仲係住石澳 kar
回覆刪除