最佳男主 "腳"

今日放工返屋企, 一如平常受到威少同小白嘅熱烈歡迎, 正當兩條友仔係我面前 tum tum 轉之際, 我發現威少右面後腳有 d 唔妥..........

我見到威少吊起隻右後腳黎行,

嚇到我個心當堂離一離!

我問葉生係咪佢打過威少黎啦! (因為葉生今日成日係屋企麻!) 葉生又話冇! 仲話一直都唔覺威少隻腳有問題, 係我返黎先見到啫!

我即刻將威少隻腳由頂 "甩" 到腳指尾, 睇下佢究竟邊度有事啦! 一摸到去佢其中一隻早兩日爆左甲果隻腳指啫! 個衰仔就縮下縮下咁! 再望真 d , 又見唔到佢流血呀!

(***威少自從半歲可以出街開始, 我都唔需要同佢剪指甲, 因為只要同佢係石屎路跑兩跑, 就可以磨短哂 d 指甲, 不過亦因為咁, 有時個衰仔跑跑跳跳得太犀利果陣, 就會整到自己爆甲! ***)

跟住再望下個衰仔啦! 佢不但止行果陣吊高隻腳, 就連佢攤響地下嘅時候, 都將隻腳抬起 wor! 心諗唔通真係咁嚴重? 唔係又好似小白咁有隻 "黃金右腳" 呀?

試下俾 d 雞肉片引下佢, 睇下佢會唔會行得好 d 啦! 見佢都行到就住就住咁! 再加埋果對眼水汪汪想喊咁款望住我, 好似好陰公咁! 攪到我個心立立亂! 差 d 就叫葉生車我同佢去睇醫生架喇!

諗住俾埋野佢食再睇下點先啦!

食完野之後例牌要放佢出花園尿尿啦! 個衰仔一出到去, 係個花園度走黎走去, 輕鬆自在! 我就知道我俾個衰仔坤左喇!

葉生仲話威少冇事咪好 lor!

係好......................好好戲呀!

個衰仔根本就冇野! 係見我返黎扮野俾我睇! 要我注意佢! "炸" 我嬌!

佢係花園尿尿之後返入屋, 就再冇吊高隻腳喇! 又係度同小白玩到鬼咁高興! 慌唔係尿尿之後開心過頭, 唔記得左要連戲咩!

呢個衰仔好戲成咁! "導盲犬小Q" 都唔係佢果皮啦!

你話佢幾不知廉恥呀! 俾我鬧緊都笑騎騎咁望住我!

我再話佢兩句咩? 借 d 意又望第二度, 好似唔關佢事咁呀!

威少仲唔係最佳男主 "腳"?

瘀血!

尋晚睇睇下電視, 又見到威少坐成咁...........

俾葉生喝左一聲之後, 仲要縮埋對腳 tim!!

 真係激屎我喇!!!!!

男人老狗坐成咁! 簡直係洛威界嘅 "瘀血" 呀~

誰是真兇?

身為洛威拿, 威少果 d 坐姿真係笑大人個口!

初時都會諗, 威少真係攪鬼喇!

直到近排將佢地 4 隻野 d 相重新編排嘅時候...............

原來我地自己一直都唔發覺, 令到威少坐成咁嘅兇手就係 coffee!!!!

罪証 (一)

有冇見過有狗狗會摺埋對手坐先? 仲係洛威 wor!

再睇下我地 blueblood coffee........

罪証 (二)

突出單隻豬脾.........

又睇下 coffee ..........

 威少仲唔係學哂 coffee?

香噴噴~

如果有接觸過洛威拿呢隻狗種嘅都會知道, 洛威拿嘅體味都幾犀利下, 好似我以前隻咕嚕為例, 即使佢剛剛沖完涼都好, 你一摸過佢之後, 隻手陣味唔用洗手液係唔會洗得甩嘅!

因為威少細細個就跟我地係屋入面住 (以前咕嚕係花園咋!), 夜晚仲會跟我地入房訓, 所以係選擇威少嘅洗毛水方面, 我都花左唔少時間 (同埋金錢啦!)

終於俾我搵到呢一支 "海藻洗毛水" 俾威少用, 佢仲標榜係 "無添加" 嘅洗毛水, 威少用左之後, 不但止冇出現皮膚敏感, 而且果陣洗毛水香味仲可以 keep 到成個星期 tim! 呢隻洗毛水果種香味絕對唔係咩花香果 d , 但係我又真係諗唔到點樣形容, 總之就係清新啦!

呢隻 480ml 就大約九十幾蚊 (西貢及深水埗價一樣), 早前我係西貢仲見到有兩加倫裝, 都只係 $280! 真係抵食夾大件啦!

唔似咩?

尋日將威少 "巨變" 果 d 相俾個新朋友仔睇.........

佢睇完之後, 問我 "隻黑色狗幾得意 wor! 咩狗黎架?"

我仲好有耐性咁同佢講 "洛威拿黎 lor! 你知唔知邊隻呀??"

"吓? 洛威黎架? 人地 d 洛威唔係咁樣架! 我見過果 d 好有型, 好 smart 架! 你果隻個樣咁蠢.............真係洛威黎咩? 佢個樣都唔惡嘅!"

 心諗.........你究竟係讚定彈呀? 老友!

我於是答佢 "咁佢有我呢 d 咁 nice 嘅主人, 佢當然唔會兇得去邊啦!"

我威少唔似洛威咩? 佢冇錯係個樣鈍左 d, 笑起上黎個樣又傻傻地咁, 但係佢真係一隻洛威黎架!



我覺得佢而家咁樣幾好呀! 又唔會俾人感覺好惡咁! 蠢蠢地咁都唔知幾好!

**actually 只要佢係我嘅狗狗就係好!

"巨" 變!!

上星期五係衣帽間執野去行山之際, 又俾我搵番兩件威少細個嘅衫仔 wor!

**唔好話我唔預先講聲先呀~ 係公司睇的話就要有心理準備喇!

造型 (一) 爆笑度: ***

想當年 (即係舊年呀!) 仲係人地懷中著住毛毛帽褸嘅小朋友

今日已經變成蒙古大汗喇!

仲係傻傻地果隻............

造型 (二) 爆笑度: ****

之前係呆呆白兔仔

今日唔係白兔, 係白癡!

壓軸出場!!!! 造型 (三) 爆笑度: ***** (爆燈呀!!!)

以前係露何 B 仔嘅小寶貝

而家十足周星馳  d 戲入面欠人錢冇得還俾人逼影裸照咁款!

你話抵死得佢啦! 俾人影埋 d 咁嘅 "該煨" 相都笑得咁開心!

睇下兔仔衫原本嘅樣!

以前細個果陣就扣第一粒鈕, 而家? 扣第三粒都係 "監粗" 黎咋!

威少: 俾你兩條友仔玩左成晚, 仲係度呀吱呀阻! 咪影啦笨!

問你點頂!

唔經唔覺威少都一歲有多, 但係佢嘅身型由佢 8 個月大之後就好似冇咩長大過咁, 一路都係 keep 住 80 磅到, 我同葉生都覺得威少仲好似細隻過以前咕嚕 tim 呀!

威少細個果陣腳仔粗粗, 肥藤藤咁架! 而家就好似唔係好夠壯咁!

而且可能近排天氣潮濕又悶熱, 威少仲食少左野 tim!

於是我地就用番以前谷小白果招黎對付威少喇!

由於葉生有朋友係凍肉鋪做, 果 d 鋪頭用機 "車" d 豬排嘅時候, 會產生好多肉碎, 我地就叫朋友幫我地留起呢 d 肉碎俾我地, 聽葉生個朋友講, 有好多狗場都同佢地買呢 d 碎肉架!

我地今次攞左 10 磅番黎, 先用保鮮袋分成小袋, 再放入冰箱

其實呢 d 稱為肉蓉會更加貼切, 每次整嘅時候 (當然係先解凍啦!) 係保鮮袋底部剪一個角, 再好似唧肉丸咁唧落煲滾水度, 用烚嘅方法黎整, 第一可以將肉入面 d 油份整出黎, 第二又因為肉丸會比較有咬口, 佢地食果陣會開心好多!

烚好之後就梗係要攤凍先啦!

因為唧出黎 d 大細好難就, 所以會再剪細舊 d 再放入保鮮盒, 方便放入雪櫃!

另外再俾 d 威少同小白, 我會再加 d 狗糧同靈芝粉俾佢地!

兩位少爺點? 梗係 "澎澎聲" 清兜啦!

我諗威少係我一輪攻勢之下, 好快就會壯健如牛!

而因為小白隻 "黃金右腳" 關係, 佢要嚴格控制體重, 所以我都係俾少少佢過下口癮就算, 費事得威少有得食, 小白冇得食好慘嘅!

雪雪面~

我又發掘到我威少嘅特別技能喇!

只要有得食, 我諗可能佢遲 d 會識得背唐詩三百首 tim 呀! (講下笑啫!)

尋晚我地正食緊烏冬之際, 威少就開始表演喇!

先望住條烏冬發青光!

啜烏冬連環拍----->

威少佢係好斯文咁啜條烏冬入口架! 係差 d "雪雪聲" 啫!

睇埋小白仔笑淫淫~

小白有樣野又唔夠威少叻 wor! 如果我地用手俾野小白食, 小白每次都好心急, 十次有九次都會咬埋我地隻手嘅! 但係威少就唔同喇! 佢好輕輕力咁用口接過 d 野食, 完全唔會咬到我地架!

綺夢.......

尋晚發左一個夢, 夢見有一個男同事向我展開追求, 攪左好多花臣黎同我慶祝生日, 令我開心到不得了!

<首先要講我同呢個男同事平時真係完全只有工作上交流, 而且距離我生日仲有幾個月! 真係唔知點解會發埋哂 d 咁嘅夢!>

exactly 佢點同我慶祝我就唔係好記得喇! 只係訓醒左都仲 keep 住好開心嘅感覺 lor!

跟住係我返工嘅車程入面, 我就不斷諗番我過去嘅生日喇!

原來我冇咩令我好開心, 好難忘嘅生日架! 真係悲情..........

叫做比較開心嘅, 就係 18 歲果年, 當時男朋友 (30 歲) 同我去柏寧頂樓食 candle light dinner, 開心係因為佢有花心思去同我慶祝, 雖然最後都係俾佢呃左..........

過得最唔開心嘅反而有一個 wor! 就係葉生唔記得左我生日, 我由日頭等到佢夜晚, 一直係度諗佢會俾 d 咩驚喜我嘅時候, 點知直到凌晨 12:00 都唔見佢有表示嘅? 一問之下, 原來佢係徹徹底底咁唔記得我果日生日呀! 我真係嬲到震呀!

掉轉頭諗, 呢個咪就係葉生俾我最難忘嘅生日 lor!

之但係佢 d 朋友幾時生日佢又會記得架! 小白同威少生日又記得噃! 就係唔記得我 lor! 你話我係幾咁特別呢!

葉生有一兩次係我生日嘅時候, 都會同我出去食飯嘅! 但係係 "你生日呀麻!  咁......出去食飯 lor!" 完全 feel 唔到有任何心思果隻! 只係敷衍我生日之麻!

生日禮物? 葉生唔識呢樣野架! 佢生日我買野俾佢就有!

我地呢 d 小家種, 生日係大事黎! 我又唔係要 3 卡鑽石, 我只係想有人肯花心思同我慶祝生日, 一年都係得一次啫!

為怕佢今年又唔記得我生日, 我已經預先係佢本 schedule 度 mark 左我生日俾佢睇, 我唔想自己今年大壽都要因為佢唔記得我生日而唔開心呀!

鮮茄洋蔥煙鴨胸意粉

因為我屋企位處偏遠地區, 係放假嘅時候, 通常一日 n 餐都係屋企攪掂! (又廢事求葉生車我出去啦!)  

特別係下午果餐, 又唔想大鑼大鼓煮飯, 都常都會整 d 輕巧 d 嘅 "碟頭野"!

呢個就係我最新攪作 --------> 鮮茄洋蔥煙鴨胸意粉

- 烚好 d 意粉

- 煎好煙鴨胸

- 用蒜頭及洋蔥起鑊, 爆香後加埋蕃茄, 再加小小水加蓋煮一陣

- 用茄汁, o急汁, 糖, 豉油做獻汁, 煮到杰杰地就 ok!

真係實在容易到呢!