Almost 19 months!!

真係懶到出哂汁, 上一次寫 BLOG 竟然係 9 月!!!!!! 進度嚴重落後!!!!!冇辦法, 星期一至五返工, 近期逢星期三 OFFICE HOUR 又上急救班,公司忙到甩轆!! 放假又要湊女, 而家果隻壞旦望少眼都唔掂!! 我懷疑佢已提早開始 TERRIBLE
TWO....

(之前有睇過 D 文章話可能因為現代人營養好, 有 D 歲半小朋友已提前出現 TERRIBLE TWO)
果個壞旦而家週圍攪野架! 唔夠高咩? 又識得自己攞凳仔墊高再爬上去,俾人 (即係我) 鬧咩? 又會睇下附近有邊個可以幫手,
最叻就係搵啊婆, 仲要識得用對眼 "厲" 住我, 話我好鬧佢,同佢講咩都識得聽, 但係就唔肯講, 仲成日自己係度講 BB 話
食野方面就真係惡攪,俾健康院姑娘串到我暈,其實 LUNCH 同 DINNER 都有整 D 粥仔呀, 通粉或者烏冬俾佢食, 
但係佢就每次都食得唔多, 又食得耐, 又推三推四咁,

D 野食都凍哂啦!  每次餵佢食 LUNCH 同 DINNER 都變成一件痛苦差事,鬼咩.....個個都俾佢食大人野, 仲邊肯同你食 BB 餐呢 D 淡口味野丫!!

(我認自己都有份促成佢呢 D 衰野....)工人驚佢唔夠飽, LUNCH 後又俾 5 安奶佢, 下午四點又俾 7 安奶佢,仲未計早晚各 7 安奶 WOR!咪俾姑娘省到我立立令 LOR!佢話鴨肶呢個歲數, 又出左咁多牙, 應該只飲一至兩餐奶, 佢應該可以嘗試食其他食物佢,唔知咩, 我都想佢食多 D 其他野, 要隻壞旦肯先得架!我啊媽仲話個姑娘痴線 TIM!! 話點可以由得個孫肚餓唔俾佢飲奶 WOR!呢單野真係唔知點攪好......
過去呢兩個月真係好忙呀! JOIN 左灣仔 CPDA PG 俾鴨肶,灣仔係最新開嘅, 老師叫 MS. IRENE, 我好鍾意佢講英文發音非常準確,而且佢係唯一一個可以教到鴨肶要坐低上堂嘅老師 (雖然都唔係坐到好耐....)我好 BUY 呢個 PG 呀! 我覺得鴨肶可以嘗試到好多不同事物, 而且人數又唔太多, 連埋我個女先得 4 個小朋友,

MS. IRENE 可以分配到更多時間係幾個小朋友度, 上星期剛剛課程完結,佢地都有 SELL 我繼續上 20-24 PG 或者 20 學前班,但係因為時間問題, 而且我又覺得鴨肶未可以上到學前班所以未有繼續 JOIN,不過我會 KEEP 住留意有冇 MS. IRENE 開堂, 睇下可唔可以就到再上學去.
之前報左 4 間 NURSERY (我見有家長報 10 間), 暫時只收到筲箕灣祟真 INTERVIEW (仲要係 2 月頭)自己當然有擔心個女冇得讀, 都有覺得係因為自己報得少, 但係都唔怕得咁多, 唯有見步行步啦!!
之前有朋友幫鴨肶係鰂魚涌公園影左輯相, 我 PAT PAT 痕又用下面張相參加左 MODEL 比賽, 
完全係因為張相影得好, 唔駛係 FB 要人 LIKE 嘅情況下, 都入左 100 名

(睇佢企到港姐咁.....真係頂佢唔順......)

我地尋日去左 STUDIO 影相 (因為唔知係咪可以公開, 所以唔講邊間喇!!)
其實只係影一套衫, 我見到其他小朋友表現好好呀!!! CHOK 到不得了!!!!不過葉生話因為其他小朋友大好多, 自己識得擺 POST,
我地個女咁細, 算係咁啦!!!   OKOK~ 就等一月中睇下入唔入到頭 20 名啦!我等做星媽喇~

早幾日我個妹結婚, 鴨肶都有份做花女,(不過人地註冊果陣佢瞓左, 都冇去行到….)

我同隻衰佬

我要下定決心!!!!! 寫多 D BLOG, 記低我個壞份子 D 衰野先得!!!!!

going to 16 months!!

眨下眼又九月喇! Abbie 仲有幾日又 16 個月大! 真係好懷念佢仲係手抱 baby 嘅可愛樣!
而家? 乖果陣都還可以, 曳起上黎真係一個小魔鬼黎架!

佢而家大致上都識得聽哂我地嘅說話, 同佢講野都有八九成聽得明, 但做唔做又第二件事啦!!
好似叫人咁, 佢鍾意就一日到黑叫住你, 唔鍾意叫你的話, 就算你點樣威逼利誘都冇用!!
佢差不多識得叫哂屋企四小福...
YY (威少)
白白 (小白)
Fi Fi (coffee)
B ar (細 b)

但係就點樣都唔肯叫我媽媽 (激死我!!!!!!!!!)

識得聽某 d 英文指令 (多得工人姐姐同佢一齊睇 dvd 又教佢做!!)
turn around
clap your hands
up and down
beautiful eyes

又識得做好多好 girly 嘅野~
會撥頭髮 (係好似人地長頭髮係面旁邊痴全塊面, 拎一拎個頭撥個隻!! 真係八婆到震!!)
要攞大人 bling bling 介指戴
成日話自己 "靚靚"
我見過佢有一次望住鏡入面個自己, 指住話 "靚靚"!! 真係嘔哂血!!
成日攞哂 d 鞋出黎要著住周屋行!
又要成日拎手袋!

**不過有時又好麻甩佬, 例如會 "動" 高腳坐係度, 又成日摔口摔鼻!

食野方面, 份量都係冇咩上落!
不過我俾左好多新野佢試, 佢亦開始想自己去食 (用叉 or spoon)
又係為食妹一名!! 見到大人食 d 咩都想食埋一份!!




其實我都已經開始搵緊 nursery 俾佢讀, 雖然我一直都唔想俾佢讀 (覺得冇必要)
但係佢越黎越大, 性格開始突出, 我地發現佢係一個要好有耐性去教佢嘅小朋友,
好多時 d 野教佢一兩次 (又或者佢望住你做一兩次) 佢都會 get 到點樣去做,
不過因為屋企得佢一個小朋友, 個個都錫到不得了,
而家佢開始會發脾氣, 有不滿就大喊! 可以喊一個鐘唔收聲架! 又硬頸! (同我一樣石頭咁硬!!)
話要果樣一定要得到!! 而家識行識走, 又冇時停!
百厭到不得了! 係梳化扶手爬上爬落! 仲夠膽死凌空爬個圍欄! 開櫃門果 d 唔在講啦!
我同我媽咪商量過, 應該俾佢返下學, 同其他小朋友相處下, 等佢知道唔係得佢一個, 人人都要就佢!
我唔想佢做一個咩都唔識又冇禮貌嘅 "港童" 呀!!

almost 14 months~

真係眨下眼咁快, 過多兩日 Abbie 就 14 個月大喇!!
真係唔捨得佢大得咁快....

近期佢超級痴身! 我上網睇到話呢個時期嘅 baby 因為缺乏安全感,
所以就會有痴身呢種表現.

話說上星期五接左佢返西貢之後, 佢已經跟住我寸步不離果隻, 到我夜晚去沖涼, 諗住佢睇緊電視, 叫佢老豆陪佢一陣都 ok 啦!
點知佢眼尾望到我入左 toilet 閂埋門之後, 就喊到失哂控!! 以前只要同佢去摸下 coffee 同細 b (佢最鍾意貓....) 就會收聲,
但係都唔 work! 佢老豆又俾餅餅, 又玩玩具又摸貓都唔 work!!
最後要打開度厠所門不特止, 仲要開埋浴簾見到我先肯收聲......
(見到佢喊到回唔到氣, 香豔 d 都冇辦法......)

Abbie 由細都大都跟大人瞓, 平時跟婆婆, 返到西貢都同我地瞓, 都冇乜點瞓過 bb 床,
係西貢時就我瞓中間, 俾佢兩父女夾住,
平時佢自己瞓醒, 都會自己玩下佢條至愛珊瑚絨被仔等我醒,
上星期佢老豆見佢醒左, 諗住摸下個女咁啦!
咁自然就會搭住我 (好似攬住我咁啦!! 我都唔知點講!!)
Abbie 見到佢都豆咁樣, 即刻要推開佢呀!
跟住我地實驗左幾次, 佢老豆攬住我咁,
Abbie 都會即刻推開佢, 又會攬番住我, 唔俾個老豆攬咁!
真係 sweet 到呢......

女啊女~ 如果你大個左都仲係咁鍾意我就好喇!!
你而家就咁痴我, 過多十幾年到你長大成反叛青年期果陣, 我都好想你會記得原來細個果陣咁鍾意個啊媽!
第時大個左嘅時候, 我都希望你會抽番 dd 時間去痴下個啊媽!
唔好忘記我呀~   (真係諗到都眼有淚光....)

個貪靚鬼攞左婆婆條錬黎戴, 仲擺哂 post 俾我影相!!!




早幾個星期去左鄰居屋企游水~ 驚到係咁捉住個老豆唔放!!

人生第一次影証件相, 因為剛瞓醒, 又想想地喊, 所以影左呢個戇居樣! (完全影唔到我個女個靚樣呀!!!!!)
不過我每次望到都忍唔住笑.....全家人 (包括所有舅父 (& 女朋友), 啊姨, 工人) 個個一人一張!!

Abbie 同 coffee 最 friend, 兩個成日一齊係圍欄入面玩架!!!
佢都好鍾意摸黑鬼威同小白, 每次摸完就會自己傻更更咁笑, 影左有條片都唔到上黎.....
(係小白有時坐定定俾佢摸, 黑鬼威成日哩係窗簾後面, 怕左 Abbie....)

註: 小白係我隻細狗 (摩天使 20 磅), 黑鬼威係我隻大狗 (洛威拿 80 磅)
      仲有兩隻長毛貓, coffee 同細 b

13 months old~

踏入 13 個月大, 行路穩陣左, 又會原地跳, 有時仲會有小跑步, 總之就係冇時停!!
聽到其他人講野, 有時都會想學人講,
最好笑近期舅父同佢講 i love you, 佢就講 ai~ou
扭計多左, 特別係對住婆婆, 曳到冇朋友!!

食野方面, 朝早 8:00 食 8 安奶, 到 11:30 左右食一碗滿粥仔, 1:00 再飲 5 安奶先 nap, 4:00 又食 8 安奶, 至 7:30 食一碗滿粥仔, 到 8 點幾大人食飯佢又痴食, 9:00 到又食生果, 11:30 食 8 安奶 (我覺得佢好大食!!!!) 再加每日飲 9 安水水.

但婆婆話佢唔算肥, 唔怕食得多 wor!! 我至怕佢有我 d 肥胖因子, 食大左個胃, 大個變肥妹咋!!

而家識得聽到少部份指令會做動作, up and down 會識得趷高腳, beautiful eyes 識眨眨眼, 飛吻, 錫錫, 又要拎手袋 (應該係挽手袋),
又識得靚靚, 會指住 bling bling 介指話靚靚!
成日將舅父銀包 d 錢抄哂出黎! 仲俾錢我 tim!
一話佢又話番我! 試過俾婆婆鬧佢玩水樽, 佢走去拍工人姐姐度門, 同姐姐 lee lee lur lur 講一大輪, 好似投訴婆婆話佢咁!

我咩都俾佢試下食, 麥當當薯條, 雪糕都俾佢試下 (食少少無野嘅!!!)

之前一路食 friso, 不過由 2 號轉 3 號之後, 便便好硬!! 有時仲會幾日都冇得痾! 試過因為咁痾到 "眼眼" 都損埋!
跟住轉食思敏傑 3, 就變番每日有正常便便, 仲平成三四十蚊罐 tim!!

每日必要睇 disney dvd 先食到飯, 一播碟就好似中左降咁! 可以係 5-10 mins 之內食完,
所以每次同佢出街食飯, 因為冇得睇 disney dvd, 只可以係 youtube search disney 俾佢睇下, 食飯差過係屋企好多!!
每次俾野佢食, 問佢 taste good??? 佢會好認真咁 "up" 頭!
俾遲 d 會話你架!

一過左一歲, 即刻成個曳左好多!!!

一歲健康院檢查

好似好耐都冇返去健康院檢查咁! 因為 Abbie 半歲針係去私家打 (我都唔係好記得係咩針, 總之係六合一啦! 比政府四合一新!) 因為歲半針係半歲針加強劑, 所以黎緊歲半都係要返私家打! 雖然健康院打針唔駛錢, 但係真係一分錢一分貨, 私家要俾錢, 姑娘零舍溫柔, 針都冇咁粗, 又會就住手, 健康院 d 姑娘, 完全唔會就住! 我唔係去大西北果 d 健康院 wor! 我去西灣河果間, 唔係好多人架! 一個鐘頭左右已經攪掂哂果隻!

但係個姑娘完全唔會憐香惜玉, 大大力咁瞄準打枝針落去, 仲要每邊大脾打一枝呀陰公.....
就連葉生第一次同個女去打針, 見到都話肉都痛埋呀!
見到個女喊到冇左聲, 回唔到氣, 面容扭曲, 真係想 "窩" 呀姑娘兩搥呀!

今次除哂衫, 痾淨尿先磅 (硬係啦! 一除片片就俾杯茶我嘆喇!) 有 9.5kg (早兩個月病病去睇私家都好似差不多磅數!)
冇度高度 (又唔係多人, 都唔同我度高)
成長線 90 (佢瘦到得番個頭, 都有 90???) 我真係懷疑佢個成長表不合時宜

姑娘問我, 著衫褲果陣, 佢會唔會識得著完一隻手就自動俾另一隻手 (or 腳) 你, 講真我真係冇留意 wor! 之後番到屋企同佢換衫, 原來 Abbie 係會架!!!
問我佢便便情況, 我話轉左 f 牌 3 號仔就唔得, 而家轉左另一隻, 便便即刻好番哂!
再問我佢叫人情況, 只有佢想叫你, 你先會聽到, 反而你點樣叫佢叫人, 佢都完全唔會睬你,
想要 d 咩, 會手指指叫人去攞,
兩隻手 d 手指都相當靈活, 特別係攞餅仔果陣........
一日 3 餐 8 安奶, 午餐晚餐一碗粥仔, 再加上好多好多大人食物 (因為佢見到我地食, 就一定要我地俾佢食埋一份)
午餐後仲要隊 4 安奶先 nap, 以 Abbie 而家呢個食量, 我覺得佢完全唔係肥 lor!
仲話生長線 90 添!!!

佢 11 個月已經開始行, 到左一歲都叫行得 ok, 而家就黎 13 個月, 直頭甩繩馬騮一樣, 看少陣都唔得!

be model

其實自己成日都想同個女去影樓影相, 但係出面 d 所謂 BB 攝影套餐, 通常都唔太平, 所包 d 相又少,
而且同影結婚相一樣, 好似黎黎去去都係果 d 造型, 所以自己一路都冇實行,
之但係上年比我團購到一個 BB 攝影套餐, $228 包所有相片 (只燒錄 DVD, 唔包囇相)
可以自己帶衫, 又可以同爸爸媽媽一齊影, 真係抵到冇朋友呀!

當時一買左, 就已經想好要等到 Abbie 差不多一歲先去影, 有記念價值 d 丫麻!!

眨下眼就到約定日子, 個攝影師哥哥都好好呀!! 連埋助手姐姐兩個都出哂力引鴨肶笑!!
因為當日冇 nap, 所以鴨肶狀態其實唔係太好, 好少笑.....
不過以第一次影 studio 黎講, 仲要只係 $228, 我已經俾足 120 分!!!!

由於我影相果日係 4 月底, 因為我想將 d 相做一本相簿, 當係母親節禮物咁送俾我媽媽,
攝影師哥哥仲係一星期內就 send 左個 zip file 俾我,
等我可以 download 哂 d 相,
呢間 studio 服務真係抵讚!!!

我諗住到鴨肶再大少少, 去搵佢地再影多輯!! 就算俾原價我都覺得 ok!!
(不過有 d 朋友就話個 backdrop 太白)

11 個月喇!!!

聽日鴨肶就 11 個月大喇!  真係光陰似箭呀!!
之前團購左 playgroup 係 4 月開始上, 可能係早左少少, 不過 $50 一堂咁平,
就當俾佢接觸下其他小朋友 lor!

不過佢都係 "霸王雞乸" 果隻!! 老師攞住小結他大圍唱歌仔, 佢就死要去搶老師個結他!
人地打完鼓要收番埋, 佢又死攬住唔俾人地收,
個個小朋友坐係媽媽度一齊唱歌仔, 佢又要周圍爬,
同佢上完一堂我成身散哂呀!

之後仲有 6 堂要上, 我其實唔係想佢要學到呢咩, 只係想佢同 d 同齡小朋友接觸多 d 啫!
我見佢都幾開心呀!

鴨肶而家有 6 隻牙仔, 上面門牙旁邊兩隻都出左喇!
試食左好多野, 腸粉, 蒸包包, 河粉, 麵包, 三文魚, blueberry, stawberry, 白菜, 冬瓜, 節瓜....

每日三餐奶 (around 7-8 oz), 兩餐各一碗粥仔

高左好多, 好似瘦左, 要到 5 月中去健康院先有準確數字..

企得好穩陣喇! 仲大膽到有時會自己行幾步 tim!

會叫媽媽, 爸爸, paul (婆婆), bu (舅父)

下個月就一歲喇! 婆婆已經 book 左地方同佢攪個小型一歲生日會!
我只係希望佢永遠都健康快樂, 就已經足夠喇!!

九個半月成長報告

就連每月一 blog 都甩到唔清唔楚, 做一個 working mama 真係唔容易, 我已經比較輕鬆, 因為 Abbie 每逢 weekday 都係我媽咪度, 係 weekend 我先帶 Abbie 返西貢, 比起每日放工都要衝返屋企睇 bb 嘅在職媽媽已經好好多....

入正題, Abbie 今個月又唔同左好多, 而家已經可以企到一陣, 而佢每次都跌只係因為佢一企好就會開始 un, 一 un 咪開始跌 lor!
每次洗頭同沖涼都好似遊刑咁! 
勁 like 星星餅, 簡直係靈丹炒藥!

係 21/feb 果個星期, Abbie 第一次發高燒 39.9 度, 成家人立即進入高度緊張狀態, 6 個大人齊齊漏夜陪佢去 st. paul 睇急症, 等左成 4 個鐘, 攞左兩支退燒藥 (其中一支係 for 38.5 度以上高燒用), 盛惠 $224, 比我想像中平好多.....

Abbie 發燒唔舒服, 自然訓又訓唔好, 又扭計, 食野又唔好, 我同媽咪第二日帶番佢去睇開果個兒科醫生, 又係同一樣 2 支藥水, 再盛惠 $220, 其實都 ok, 當多一套藥看門口啫! 當時個兒科已經話佢可能會出疹, 果然燒左兩日後, (最高試過 40.2 度) 第二日就開始出疹喇! 成身都係一餅餅咁, 真係見到都陰公..... 好彩佢冇見到佢痕.....

我啊媽話呢 d 叫玫瑰疹, 唔駛食藥, 用金銀花沖涼就得, 果然沖左兩日已明顯消退, 果日咁啱係 weekend, 我帶左 Abbie 返西貢, 屋企又冇準備定金銀花, 我啊媽教話用普洱茶都得, 於是我用屋企 d 普洱茶包沖茶, 再開水同佢沖, 沖多一次, 就連少少尿疹都退埋! 呢 d 老人家心得真係不可不信!!

病完之後硬係覺得 Abbie 成個瘦左, 長高左, 對眼又腫左....

我聽到佢識講 "姐姐, 媽媽, 曳曳", 但就從來冇向正確人士叫過, 每次都係去睇醫生, 醫生一掂佢, 就話人曳曳, 再聽下心跳, 就叫姐姐同媽媽!
個衰妹應該知道係咩意思, 不過佢唔會叫我地 lor!

剛剛訓醒豬豬樣 (睇下佢個髮尾~ 同我一樣係鬈架!!!)

tv buddy 睇電視會 "拿" 高褲腳...

自從病完之後, 對眼一路都腫腫地咁....

望到最愛星星餅

葉曳曳~

一月底 Abbie 都有 8 個半月大, 雖然我每個 weekend 都有帶佢返西貢, 但係都好似未試過要湊佢咁多日, 今次農曆年放成 9 日假, 我係初四借 d 意帶佢放婆婆度訓一晚之外, 其餘差不多全部都係我一個照顧佢咋!

(葉生唔計! 佢只係一個臨時陪玩專員! 其他換片餵奶沖涼都係我做! )

而家 d baby 真係日日都有唔同, Abbie 呢排真係識多左好多野!!

可以企 (雖然唔太穩陣)
可以爬 (佢可以由 A 梳化爬過手枕到 B 梳化搵我抱)
會講曳曳 (仲係完全明白當中意思, 如果係佢自己做錯事有人話佢曳曳, 佢會立即發難大喊! 可以喊好耐唔收聲.....有次佢大傷風我幫佢吸鼻涕, 一吸完佢即刻望住我話我曳曳!!)
終於肯食粥仔 (原來條友仔鐘意熱鬧, 要大人食飯果陣一齊餵佢, 佢可以食大半碗粥!)
識扭計 (知道喊可以得逞!! 一有咩唔如意就爆機! 佢每次都交足貨, 口水鼻涕樣樣齊! 有時見到佢喊到上氣唔接下氣, 又點忍心再鬧佢? 不過我已警告所有人士, 唔可以再俾呢個曳人再咁樣扭落去, 如果唔係大個點算!!!)
會自己唱歌仔 (其實都唔知係咪, 不過佢每次睇到 donald duck 唱歌, 佢又會一齊叫...)
成日想食大人野 (每次見到我地食野都要我地俾!!)

仲有好多曳野不能盡錄, 總之佢而家活動能力叻左, 就冇再好似以前咁乖乖咁定任我地舞, 真係好懷念佢三四個月果陣.....
 



農曆新年母女裝~

Abbie 呢個賀年 look 真係人人讚好呀!!



西貢海旁沙龍照~

我的 2011

見到其他人都寫左 2011 大事回顧, 以往自己都冇呢個習慣, 不過 2011 年對於我黎講,
真係有好多新事, 令我會想特別為呢一年作一個記錄, 記低過去一年發生的事.....

2011 年 3 月12 日

自從 2010 年 PLAN 左 2011 年結婚之後,  2010 年 9 月左右又意外發現有左 BB, 呢一個其實都係預計中嘅意外, 最初 PLAN 結婚就係想生 BB 啫! 只不過早左少少, 同埋次序調轉左,  而安排 3 月就係要就葉生老豆老母係香港之餘, 又要就埋佢 d 大陸親戚, 當然就係夾過日子啦!

呢一日我地上律師樓註冊之後, 就係某酒樓擺左 5 圍招呼 d 親戚, 仲記得當日我頂住 7 個月嘅肚敬茶, 真係企到腳都軟!

2011 年 5 月 5 日

我由 4 月底開始放我個前一後九產假, 5 月 5 日就係原來預產期, 點知可能我個肚太舒服, 葉小姐延期居留一星期

2011 年 5 月 12 日

因為已經過左預產期, 我係 12 號晨咁早入院催生

2011 年 5 月 13 日

好好彩, 3 點幾開始陣痛, 7 點幾開始大痛, 10 點幾落產房 (開左 4 度), 12 點 44 分葉小姐就出世喇!

2011 年 6 月 13 日

葉小姐滿月酒

2011 年 7 月中左右 (up to now)

我回復上班的日子, 葉小姐平時會係婆婆度, 直到 weekend 我先會帶佢返西貢, 為免個女唔跟我, 我每星期二都會去娘家過夜, 星期三係娘家直接返工, 到星期五放工再接個女返西貢, sunday 先送佢返娘家, 生活比起以前頻撲左好多, 但係為左個女冇計!

2011 年 11 月

一個遠方的朋友返黎, 好多野都唔同哂! 原來以為已經放底哂, 但係一見番面, 就好似撻番著個掣咁! 成日都會記番起 d 無聊野! 同自己講要 "心靜".....


2011 年 12 月 (before christmas)

其實個女出世之後, 自己壓力都好大, 要求啊媽湊佢啦! 自己生活模式又唔同左, 最重要當然係金錢問題啦! 可能好少事已經可以辣著我! 特別係我老公! 佢愛理不理嘅態度, 曾經令呢段婚姻有可能一年都捱唔到,  但係一想到個女, 幾辛苦都要捱過去!


眨下眼個女仲有幾日就 8 個月大喇! 幾時可以望得到佢大個呢......