尋晚我打電話俾我親生啊媽, 我原意係打電話去關心下佢, 始終係爸爸過身之後, 大家嘅關係好似再冇以前咁薑! 經過上幾次見面, 我好天真咁以為佢真係放低左以前發生過嘅事, 可以大家好好相處, 卒之繞個大圈佢又係講番十九幾年前嘅事!
無論我講 d 咩, 佢都拉番以前, 我知道佢唔相信, 但係有好多野我真係完全唔記得左, 我都好懷疑自己, 當然都有懷疑佢講嘅野係咪真啦! 但係都過左去咁耐咯! 你仲記住呢 d 野做咩呢? 既然係唔開心嘅事! 咪由得佢 lor! 我知可能傷害好深, 咁唔通我 18 歲就出黎住又容易咩?
你一而再咁提起, 証明你仲係好介意, 講左你又唔會開心, 我聽左就更加唔會開心, 咁點解仲要提呢?
佢仲要不斷提醒我有幾咁唔掂! 我個親妹又話 feel so sorry of my life! 真係多謝哂呀! 多謝哂你地提醒我呀! 聽到你地咁講, 我原來真係折墜到就黎要死呀!
呢個世界同我血緣最親嘅都尚且咁講我, 又何況我 d 好朋友呢?
你地一個二個你一句我一句咁數我! 我知! 怪得邊個啫! 當然亦都唔係呢個社會嘅錯啦!
it's all my fault 呀!
我有爺生, 冇乸教!
我讀書唔成三大害!
我冇家教! 冇禮貌! 冇原則! 冇學識! 冇錢!
我處事不當呀麻!
真係襯你地唔起呀! 差 d 就係社會嘅敗類! 死不足惜呀!
枉我啊媽細個咁裁掊我, 除左讀書之外, 我照顧細佬妹, 買餸煮飯, 冇校園生活, 冇自我, 原來都係為著我一個人出黎住所作嘅最好準備, 唔係尋晚得佢提醒, 我真係忘記要多謝佢!
佢仲用養狗黎比喻我添呀! 我都唔知佢係攪緊 gag 定係咩呀??
又話我咁得閑, 可以搵佢傾下計 wor! 又講以前果 d 不堪回首嘅事? 我真係唔想聽唔想提呀!
點解我屋企人咁與眾不同呢? 屋企人唔係有事果陣會互相鼓勵咩? 定係我真係咁不知所謂呢?
呢一個 moment, 我真係冇憎我啊媽, (不過佢唔信!) 亦冇憎任何一個人, 我只係懷疑自己啫!
