真係無辜辜呀~

除左我成日帶返屋企玩果隻金毛 goofy 之外, 鄰居姨姨仲有兩隻唐狗, 呢兩隻唐狗真係唔講得笑, 任何陌生人行近, 都已經吠都七彩, 如果再行埋 d, 佢兩條友仔真係會咬人架! 所以平時如果有人上姨姨屋企, 都會將佢地放入圍欄或者放入房, 如果唔係發生命案都似, 上次試過有人送汽水黎, 佢兩個即使已經放左入圍欄, 都可以兩個一齊推郁個欄, 再跳高咬人地架! 我叫做成日都上姨姨屋企, 果兩條友仔先叫做俾番兩分薄面我唔咬我, 所以有時我上去, 都未必需要困住佢地, 咁但係又唔可以將佢兩個當成 goofy 一樣看待, 因為佢兩個 d 保衛意識好強, 所以都會好小心對佢地. 

早幾日姨姨放假係屋企, 咁我咪走去佢屋企同佢吹下水囉! 姨姨住係我隔離果棟屋二樓, 正當我係樓梯行緊上去之際, 姨姨打開度門諗住俾 goofy 迎接我, 點知係呢兩條友仔出左黎, 仲扭哂屎忽擺哂尾咁款! 我都不以為意, 因為姨姨又大大件企係度, 而且兩年黎都冇咩事發生過, 所以都冇咩特別防備.

點知其中一隻唐狗女係我大脾度 "及" 左一野 wor!

姨姨見到都嚇左一跳! 即時攞爬山棍隔開佢地啦!

當時我又唔係特別痛, 都冇咩特別理佢, 點知後來去厠所先發現, 成大個牙印係隻腳度呀! 仲有一條俾牙拖過嘅痕跡 tim 呀!

<警告> 如果怕肉酸, 奉勸唔好睇!!

..........

..........

..........

..........

..........

   

我第日都有去睇醫生, 打左技破傷風針同埋攞左 d 消炎藥, 不過就行路都有少少扯住痛 lor!

真係血光之災呀!

之後應該係咪會發達呢??

真失禮.........

年初四帶威少同小白去西貢搵 Dr. Mike 檢查同打預防針, 睇醫生前係全記露天位飲茶嘅時候, 隔離檯個啊姐一見到威少就已經笑到見牙唔見眼咁!

啊姐不斷話自己好鐘意洛威, 不過因為居住環境問題養唔到, 又話我威少好得意, 最攞膽係問我威少夠一歲未! 因為睇到佢唔係太大件同埋個樣好小朋友...............

真係唔知好嬲定好笑! 我威少已經足左 2 歲喇!

(雖然個樣係白痴同埋低能左 d !!)

跟住又有個鬼佬係咁影威少 wor! 佢仲用純正廣東話同我講 『我都養左一隻差不多咁樣嘅狗, 可唔可以俾我影多幾張相??』

而家 d 鬼佬真係犀利!

跟手去見 Dr. Mike, 並且到最緊張嘅磅重時間!!

..........

..........

..........

係 83 lbs! 比起 2008 年 2 月重左成 3 磅呀!

正確 d 黎講, 係由佢 8 個月大到而家都只係重左 3 大磅咋!

所以咪成個中童咁款 lor!

真失禮...............

恭喜發財 (wild 版)

好耐都冇係度同大家見面, 趁住農曆新年, 就等我同大家拜年啦!

拜年之前, 當然要俾大家睇下我一身潮狗打扮啦!

我肥媽買左條 "野性的豹紋頸巾" 俾我, 再加埋幅 rayban 超, 就連鄰居姨姨都話我好 "wild" 呀!!!!!

 

當然啦! 我身為 model 界一份子, 又點可以一成不變呢??

我同肥媽啊爸, 小白, coffee 同細 b 祝大家牛年行好運! 身體健康! 逢賭必勝! 心想事成!

恭喜! 恭喜!!!!!