唔駛聽果個呷醋鬼講啦!
呢兩日因為佢呀哥小白肚痾, 所以會冷落左威少 lor!
小白由星期三晚開始肚痾, 當晚開始已經禁食, 諗住唔俾野佢食, 等佢痾清哂先再俾雞肉飯佢食, 點知尋日佢除左肚痾, 仲嘔添! 我即刻請假同佢去西貢 Q-pets睇肥仔 mike 啦!
其實以前 d 狗狗因為肚痾睇醫生, 一般 d 獸醫都會用針筒去抽 d 屎屎出黎睇, 但係 mike 就會用手去撩 (當然有帶手套!!), 差在未隊埋個鼻度聞咋! 令我覺得佢比其他獸醫用心 lor!
不過小白仔就慘 d 喇! 本身已經肚痾啦! 仲要俾肥仔 mike 隻肥手指通櫃! 係咁嘅情況下俾肥仔 mike 開苞, 真係陰公呀~
肥仔 mike 嘅結論係---> 小白食左 d 野敏感所以肚痾, 叫我以後要小心 d 小白嘅飲食!
打左兩枝針, 開左一個星期藥, 收左我 $372, 獸醫黎講真係收得平!
我諗諗下, 梗係我盤點夜返, 葉生個死鏟又俾 d 人食嘅野小白食啦!
2008年6月27日 星期五
2008年6月13日 星期五
無膽鬼 -> 小白仔
小白唔經唔覺都已經 5 歲半喇! 佢係我第一隻養嘅小狗, 初時咩都唔識, 見到小白肚痾就以為佢就黎死, 喊到豬頭咁款, 一路養一路學, 雖然而家都唔係咩專家, 不過最緊要健康就得啦!
小白係我屋企嘅親善大使, 係人黎到我屋企都可以攬攬抱抱, 佢仲會好定咁坐係人地大脾 (不過對眼係望坐我嘅!), 但係對狗狗就唔同喇! 不論大狗細狗, 小白見到都會好驚! 驚到係咁流口水! 有時仲會驚到四圍避走! 就好似初初威少黎到, 即使當時威少仲細隻過佢, 小白都驚到流左一個星期口水! 另外就係每次去親獸醫診所, 小白又係 non-stop 咁流口水!
每當行雷閃電, 就係小白最驚嘅時候, 佢會驚到全身震哂! 佢果種震就好似電視劇人地觸電咁款! 連 d 牙都係度震! 又要 "痴" 係我地身邊! 初時都覺得佢係度扮野! 但係你見到佢果個驚樣! 又覺得佢好陰公咁! 好似呢幾日咪不停落雨又行雷閃電嘅! 小白都係屋企震左幾日啦!
尋晚行雷果陣, 我又放工未番到屋企, 葉生又咁啱沖緊涼! 小白誇張到跳左入浴缸搵葉生呀! 因為我地有用浴簾, 所以初時葉生見唔到小白跳左入去, 因為小白只係企左係浴簾同浴缸之間, 後來葉生奇怪點解塊浴簾會突起左一大舊呢! 再睇真 d 見到四隻腳! 先知道小白跳左入去! 真係笑死人呀!
無膽鬼 >>>>> 小白仔 (三個月大)
**小白仔細個真係好 cute 架!
2008年6月9日 星期一
收穫 ~ 自家篇
究竟我買左 d 咩俾自己同葉生?
for 葉生~
迷彩短褲一條 (199 bht)
t-shirt 好多件 (1000 bht 有 6 件)
**張相只係影左少部份 (件貓貓 t-shirt 係我嘅~)
同埋幾包貓屎 (豬肉鬆條) 加龍眼肉乾 lor! 唔夠 3 日就已經俾葉生 k.o. 哂喇!
for 自己~
皮製 coins bag & 什物袋各一 (大 550 bht, 小 350 bht)
**呢兩個皮袋仔真係買得好呀! 我公司同事個個讚好呀! 金色 coins bag 真係襯哂我!
拖鞋 2 對 (@ 250 bht)
**冇睇錯! 確實係 250 bht 一對! 平平地都 ok 啦!
仲有幾個爸爸同幾條 un un (費事影相登出黎嚇親大家啦!), 不過而家泰國 d 爸爸都唔係平過香港好多! 而且 d 款同香港嘅一模一樣!
計我話買寵物野仲抵過買人嘅野! that's why 我買得咁少野俾自己同葉生 lor!
2008年6月4日 星期三
收穫 ~ 狗狗篇
之前無意中係 maxboy 度睇到泰國賣狗狗用品地方資料後, 我就已經立下決心! 一定要去到呢 d 地方買野俾佢地兩兄弟喇!
地點包括: siam paragon gourmet market 狗狗用品部, centralworld zen 狗狗用品部, night bazzer "D" zone (專賣寵物用品), 翟度翟 section 17-19.
雖然而家泰幣成 1 對 4, 比起以前 1 對 6 高左好多, 但係我都買得好開心呀!
究竟我托左 d 咩返黎呢?
去片!
24 吋不銹鋼 choker 一條 (270 bht)
**我係香港搵左好耐喇! 一係就幼過頭, 一係 d 鐵圈細得滯, 呢個款我之前見姨姨有俾佢隻金毛用, 我已經好鍾意, 難得係泰國見到, 立即扑搥!
SLEEKY 零食一大堆 (20-30 bht)
**林林總總啦! 咩款都有 d 咁!
潔齒骨骨多款 (20-30 bht)
**咁平! 諗都冇諗就將貨架上面成行掃哂啦! 旁邊 d 人以為就黎飢荒呀!
bacon (375 bht) X 2
**你地梗會話 375 bht 唔平哩~
375 bht 係一箱唔係一包 wor! 一箱有 12 包, 除開都唔駛 8 蚊一包! 我一打開啫! 威少訓著左都彈起身呀! 不枉我托兩箱番黎!
抵到震雨衣一件 (300 bht)
**之前見到細佬件 "扮金毛黃色雨衣" 已經流哂口水啦! 去到見到呢件紅色掌印雨衣直頭發青光呀! 仲要唔駛一百蚊 tim! 睇下我威少著得幾有型!
(ken...........妒忌嗎?)
紅色抓毛衫仔一件 (110 bht)
**我小白仔成身白雪雪, 著呢件衫仔真係靚仔到爆呀! (係張相影得衰 d 啫!)
最後隆重介紹................
"I AM A VIRGIN" t-shirt (大 190 bht, 小 110 bht)
兩兄弟一狗一件! 真係好切合佢兩個嘅狀況呀!
其實上面寫嘅都只係表面價, 我又點會咁順攤俾錢呢! 我當然會本著厚顏無恥嘅精神再去 "R" discount 啦! 平得 10 蚊得 10 蚊麻!
只係佢地兩隻野 d 零食呀! 就已經塞爆左我大半個喼喇! 好彩過關冇俾人查咋!
2008年6月3日 星期二
泰國行 ~ 無聊篇
上星期係我第一次去泰國, 去之前都有做過 research, 知道果度賣狗狗用品好平, 所以帶定個大喼去, 諗住瘋狂入貨!
最初我直頭係未出發先興奮果隻, 不過亦因為期望越大, 所以失望越大吧! (唔關泰國事.........係個人問題啫!)
今次間新酒店 courtyard by marriot, 係上年年尾先開, 樣樣設施都好新, 行去 siam 同 centralworld 都係 5-10 分鐘, 又近 BTS 站, 值得推介!
酒店豐富自助早餐 (日日食都願呀!)
outside cafe 無聊自拍
雖然房間唔算太大, 不過因為開左冇幾耐, 所有野都新簇簇!
厠所以玻璃相隔! 如果係 couple 去的話, 都幾得意!
雖然我勁怕熱, 不過去到其他地方, 都要體驗下民情, 所以特登搭 BTS 去 JJ market
行 JJ market 真係熱到痴肺! 不過就買到好多又平又靚嘅衫仔俾威少同小白! 又買左 t-shirt 同迷彩褲俾葉生! 仲買左 d 好好食嘅 snacks 做手信!
仲係 zen 度見到一隻逼真度十足, 真狗 size 嘅塑膠洛威! 如果佢有細隻 d 的話, 真係想抬隻返香港擺係門口!
又去左唐人街食魚翅, 不過 d 魚翅分量就真係...............
飛機窗外........
如果下次再去泰國的話, 一定要有一個好 partner!
(收穫篇 coming up................)
訂閱：
意見 (Atom)